إرحل

إرحل وخذ من ذكرياتك من وهم معها و زيد
من السوالف ماعرفت منها وفهمت وزيدها

اللي مضى شيٍ مضى واليوم لك يوم جديد
انسى جروحٍ قد مضت وش فايدة تجديدها
لم لم جروحك مابقى بك حيل للجرح الجديد
تكذب على نفسك تقول نفس المشاعر عندها
أية مشاعر ترتجي من صاحب القلب الحديد
لدام حتى حضوة الود لا طلبته ردها

حتى متى لك تنتظر ويش الذي منها تريد
اللي تريده انت منها خطوةٍ ماتريدها
غير طريقك عن طريقِ منت منها مستفيد
ماتت محبة ترتجيها عندها في مهدها

لم لم جروحك ابتعد وابعدبعد عنها بعيد
اذا رفضت هي المحبة ويش ترجي عندها

واحدأحد

قال هل عرفت ويش الجديد
بالفيزياء علمٍ أكيد
مافيه ربٍ للعبيد قلت يكذبون
تعال نحسب من جديد
أنت تستفيد وانا أستفيد
نقيسها بالعقل ودع أفكار
من قالوا وهم مايعقلون
لابد لهذا الكون ربٍ خالقه
لوكان به مايؤمنون
تقول خلق الكون نفسه عن طريق معادلة
وأقول ممكن ليه لا أصل الحياة ذي كلها
تسير ضمن معادلة
وكل شيء بهالدنيا له بداية
ومنها ينطلق ثم ينتهي
وفق النظام اللي أراده خالقه
سبحان رب خالقه
واحد أحد
لاتعتقد
ان الحياة تأتيك كيف ماتشتهي
وتقول أصل الكون كان من النواة
واقول لك ممكن سؤال
من هو خلق هذي النواة
حتى أصبحت تلك النواة
قال أنت أصلك ماعرقت
سر الحياة منذوالأزل هناك مادة
تنتج الطاقة ومن الطاقة تكون
يعني الحياة مجادلة
يحصل سببها مبادلة
يطلق عليها معادلة
قلت ودي أسأل ممكن أفهم
من خلق المادة من العدم
حتى تكون معادلة
المسألة ياسيدي ماهو سبب
تحريك هالكون العظيم
أكيد له معادلات بقدرة الرب الرحيم
شيء ان عرف شيء من عرف
وفوق كل من يعلم عليم
المسألة من أوجد الكون العظيم
ياصاحب العقل الفهيم
ان لم يكن الله مبدع للوجود
فمن يكون؟
خلك من اللي يعقلون
ماراده الخالق يكون

هو مبدع الكون العظيم
والخلق بأمره سائرون

باللي يريده مجبرون
حتى ولومايؤمنون

قال البشر مخيرون
احذر تقول لامجبرون

قلت اختيار
في وسط اطار من الجبر
والكل ملزم ماأمر
افعل كذا يحصل كذا
وافعل كذا يحصل كذا
وكلٍ بما يفعل يكون
هذا العدل ومن أعدل
من الله خل عنك الظنون
ومن فوق عدله رحمته
اللي وسعت كل ماخلق
سبحانه الرب الرحيم
ومن فوق ذا مشيئته المطلقة
باللي يريد هوالإله اللي خلق
وكل ماسواه من العبيد
ياهل فهمت ولاأزيد
قال لافهمت سبحانه

الرب العظيم

مررها جلا

انسى ومررها جلا
لوكان جرحك مانجلا
والله مدري يلام من؟
المجتمع ولا الزمن
أولاملام ؟إلا لحظٍ
لرتجيته قال لا
والله مدري يلام من؟
مين السبب؟في حفر قبر
الحب واحضار الكفن
حتى اندفن ذاك الغلا
والله مدري يلام من؟
بس الحقيقة إنا بزمن
مايؤتمن وقتٍ يخون
فيه الحبيب باهون ثمن
وقت المشااعر فيه
ماتسوى ولوكلمة
لمن نعطي الغلا
حتى ولو كلمة هلا
آآه يازمن وين الغلا
اللي ماضي الأيام
في حضنك حضنت
ماخان عهده وانت خنت
أوهمته بجمع الوصل
لكن كذبت ولاضمنت
ويومه سأل جاوبته
إنسى ماسلف ماضي
بلى مثل الكلا يبدأ
خضر يرجع يباس
وينطحن آآه يازمن
كم كانت صروح الغرام
ذيك الليالي شاهقة
كم كانت افواج المشاعر
من غلاه متلاحقة
وكم كان قلبي وقلبه
العاشق سكن لأجمل
غراااام بس ان قتل
مابين مدخل قصره
العالي وصيحات الحزن
يعني بصراحة يازمن
أنت البلا ومنك البلا
لكن أقول ياقلبي
المشتااااق ليتك
تعتبر ان اعترض طيفه
يمر كنك تشوفه بالنظر
ولاهجس لك هاجس
الذكرى وناداك الحنين
لاتجاوبه باللي يظن
لتقول مين؟ ولُا تحن
ولاهلابك ياغلا
قد كان لك حب وخلا
ذاك الزمن وأقفى الزمن
لاتنتظر؟ مايرجع اللي
كان لافات الزمان
يعني بصراحة إنسى
الغرام اللي مضى
وأضحك ومررها جلا

الأواكس

قالها العقل المشاكس
تحت جنحان الأواكس
تفتخر باللي صنعته
ذاك شر ولك جمعته
من افرازات المدارس

كان تبي صدق الحقيقة
انتظر مني دقيقة
ثم ركز بالزوايا
وانعكاسات المرايا
واستمع قول المشاكس

أنت خلية أولية
طاحت من صلب المناكب
عن طريق خيوط دقيقة
تشبه خيوط العناكب
تدري انك ماسلف من
هالزمن كيف كنت ساكن
في ظهر مخلوق مثلك
مادرابك وأنت خانس

في حمى مسكن صغير
كنت به راضي وراكن
مثل حشرة في مجاهل
شرنقة هذا مجالك
يمكن الحشرة فضاها
كان لها أكبر من مجالك
وكانت أشرف منك مخرج
خارجة من شرنقتها
وأنت جيت من المحابس
لانظيف ولاانت لابس

يوم أراد الله نزولك
دون فعلك دون قولك
هبت رياح المشيئة
من أمر رب المشيئة
وحركت ماكان ساكن
بعثرت هادي سكونك
وابعثت فيك الخلايا
وصورك انسان عاقل
بين متفائل ويائس

وقال هذا الكون ملكك
بس خلك فيه عادل
أسم واحد أصل واحد
ساكن في كل الأماكن
وآمرك حسن النوايا
وان يكون الحب غاية
وأن يكون الدين حارس

وكل من حولك شقيقك
مخرجه مخرج طريقك
مابها الدنيا تنافس
دام فيه الموت كابس
بأي لحظة من حضوره
تأقف أعمال الخلايا
وكل رطب يصير يابس

لكن غرتك الحياة
مادريت ان الحياة
درب وتأصل منتهاه
تصنع آلاتك لموتك
ويرتفع بالذنب صوتك
ماتخاف عدل الإله
أوجزاه في من عصاه
عشت وسط الكون عافس

كم عبثت في هالطبيعة
وقلت ودي بالطليعة
تشتري الشر وتبيعه
في سماك الحرب قابس

تحتها عدة مساكن
بعضها فوق بعض ساكن
شاملة كل المزايا
وجامعة كل الدنايا
وأنت فيه ابا الفوارس

ياكثر صوت المصانع؟
والتوابع والمنابع
في زمن مابه موانع
بس وجه الكون عابس

أقرب الناس للجمال
من بقوا على الطبيعة
ساكنة بطن الزوايا
هل سمعت بشعب مايا
قلت سمعت بشعب مايا
قال صورة من البداية
لو بدا عاري ملابس

قال سمعت في اسم أنثى
نعم أنثى بس خنثى
كل ماتنجب خداج
ينكسر مثل الزجاج
تفرح لصار الدمار
تكره لاقام الخضار
قلت سمعته يامشاكس

حبس حابس شهب قابس
لايحل بالكون خافس

قال فاسمع من مشاكس
ذي حضارتنا الحديثة
كل شرً وحل فينا مصدره
تلك الخبيثة؟

قلت ممكن بس ؟ لكن
كل من مر الأماكن ما وجد
شيء بالأماكن خارج
عن ظل الأوااااكس ؟